Nagasaligmato ang pahayag sang mga opisyales sang Bacolod may kaangtanan sa pagbakal sang galamiton sa distance ukon blended learning sa School Year 2020-2021 gamit ang Special Education Fund sang Bacolod City government.
Sa interview sang Bombo Radyo kay Bacolod City Councilor Renecito Novero, chairman sang committee on education sa Sangguniang Panlungsod kag miyembro sang Local School Board, purchase request pa lang ang nahimo sa subong nga pinakauna sa procurement process.
Suno kay Novero, ginalakipan sang risograph, ink, bond papers, laptops, tablets kag stereo radios ang ginbutang sa purchase request.
Suno kay Novero, nasubmit na ang purchase request sa opisina ni Mayor Evelio Leonardia kag icheck pa sang technical group.
Igapublish naman ini sa Philippine Government Electronic Procurement System (PHILGEPS) kag patigayunon ang pre-bidding.
Pagahulaton naman ang purchase order bangud kun wala ang PO, indi makabidding.
Aminado man ini nga nadelay na ang pagpamakal sang mga galamiton para sa pagbukas sang klase bangud man sa proseso kag sa COVID-19.
Gin-athag ni Novero nga wala nabuhinan ang Special Education Fund (SEF) apisar nga may yara sang pandemic.
Apang wala man sini ginlipod ang pagkuha sang pondo sa Sports program bangud wala naman sang division kag national meet bangud sa Covid-19.
Samtang, ginpahayag naman ni Executive Assistant to the Mayor Moises Dela Cruz nga inugdeliver nalang ang mga risograph kag duplicators.
Suno diri, natapos na ang bidding sang 68 ka mga risograph.
Apang sa pagpadayon sang interview, nahinambit ni Dela Cruz nga ginahulat pa ang pirma ni Mayor Evelio “Bing” Leonardia sa PO agud madeliver na ang mga ini.
Suno sa executive assistant, wala pa nabidding ang mga laptops kag tablets.
Samtang nagalaom ini nga madeliver na sa Lunes ang risograph kag duplicators sa tion nga mapirmahan na sang alkalde ang purchase order.
Nahibaluan nga indi makabidding kun wala pa sang purchase order.
