Balik na subong nga adlaw sa trabaho ang mga empleyado sang Kapitolyo sang Negros Occidental kasunod sang lockdown nga ginpatuman sang tinalikdan nga semana.
Sa statement nga ginpagwa ni Negros Occidental Governor Eugenio Jose Lacson, hilway na ang mga empleyado sa pagbalik sa trabaho sa Lunes.
Sa tion sang lockdown suno kay Lacson, pito ka mga empleyado ang nagdugang sa mga naidentify nga positibo sa COVID 19 kag napunggan ang paglapta sang virus sa Kapitolyo.
Nagmadinalag-on man ang provincial government suno sa gobernador sa pag-isolate sa mga empleyado kag paghatag sang husto nga pagbulong sa mga health facilities.
Suno kay Lacson, nag-ayo na ang walo nagikan sa 22 sa confirmed cases kag nakapauli na sa ila balay matapos macomply ang 14 ka adlaw nga quarantine kag pagnegatibo na sa virus sa ikaduha nga swab test.
Ang initial close contacts naman sang 142 ka mga empleyado ang nagnegatibo sa virus kag maayo man ang pamatyag.
Suno kay Lacson, ang mga opisina nga nakompromiso bangud nabisitahan sang COVID positive ang napaidalom sa decontamination samtang ang mga empleyado naman ang nagtinir sa ila balay kag nagmonitor sang ila kaugalingon nga health conditions.
Kadungan sang pagbalik sang full operations sang kapitolyo subong nga Lunes, ginmandu sang gobernador ang pag-obserbar sang health protocols kaangay sang pagsuksok sang face mask kag face shield.
