Pahanugutan na sumugod subong nga adlaw ang pag-take out sang pagkaon sa mga karenderya sa Barangay 18 ciudad sang Bacolod nga nahamtang sa atubang sang Corazon Locsin Montelibano Memorial Regional Hospital matapos ini nga ginlockdown sang nagligad nga Agosto 14.
Nahibaluan nga magluwas sa 29 ka mga balay sa Barangay 18, ginlockdown man ang mga karenderya sa amo nga barangay agud malikawan ang paglapta sang virus.
Sa interview sang Bombo Radyo Bacolod kay Punong Barangay Madeline Diaz, ang barangay mismo ang nagsuporta sa mga kinahanglanon sang mga apektado.
Apang bangud indi masustiner, suno kay Diaz, iya na pahanugutan subong nga adlaw ang pag-take out sang pagkaon sa mga karenderya.
Ginpahayag sini nga iya naintindihan nga sa mga karenderya sa ila nga barangay nagabakal sang pagkaon ang mga staff kag personnel sang amo nga ospital.
Dugang pa sini nga asta lang gid sa entrance pwede makabakal kag indi sila pwede makasulod sa barangay.
Ginhatagan-pagtamod man ni Diaz nga iya na ginmanduan ang mga nagabaligya nga dapat magsunod gid sa standard health protocol kaangay na lamang sang pagsuksok sang gwantis, face mask, face shield kag dapat naka hair bun ang mga ini.
Suno pa kay Diaz nga nakaputos na nga daan ang mga pagkaon agud hapos nalang nga itake out.
Sa karon, nagdangat na sa 12 ang kabug-usan nga nagpositibo sa amo nga barangay apang isa diri ang indi gid residente sang Barangay 18 apang dira masami nagakaon bangud nurse ini sang CLMMRH.
