Masobra na 500 ang mga nadakpan nga violators sang Bacolod City Ordinance No. 934 ukon non-social hours nga nagaumpisa alas 8:00 sang gab-i tubtob alas 4:00 sang kaagahon samtang nagdangat na 600 ang mga nagalapas sang indi pagsuksok sang facemask kag social distancing.
Sa interview sang Bombo Radyo Bacolod kay Police Lt. Col. Ariel Pico, tagpamaba sang Bacolod City Police Office (BCPO), santo sa datos, ang nagapanguna sa gihapon sa may pinakamadamo nga mga naglapas amo ang Barangay Taculing, Barangay Banago, Barangay Mansilingan, kag Barangay Alijis.
Suno kay Pico, may yara man sang mga nagkaladakpan nga mga menor de edad kun sa diin ginaturn-over sa barangay kag Department of Social Services and Development (DSSD).
Suno kay Pico, indi man tuman kadamo ang mga recidivist ukon ang mga nagasulit-sulit sa paglapas sang ordinansa.
Ginpahayag man sini nga may yara naman sang ginadihon nga ordinansa ang syudad nga natapos na sa first reading kun sa diin ang mga ginikanan ang mamultahan ukon mapriso bangud ginapabay-an ang mga kabataan nga magliho-liho sa tion sang curfew hours kag kun maaprubahan ini sa third kag final reading, ang mga ginikanan ang sarang nga mamultahan sang P3000 tubtob P5000 kag sarang mapriso sang anum ka bulan.
Ginapasakaan naman sang kaso ang mga recidivist paagi sa regular filing bangud sa paglapas sa Article 151 sang revised penal code.
Aminado man ini nga malawig nga pasensya ang kinahanglan sa pagpanakop sang mga padayon nga nagalapas sa ordinansa.
Suno kay Pico, sa pihak sang kakulangan sang tawo kag mga regular nga ulubrahon sang police, magapadayon sila sa pagpatuman sang ordinansa.
