Duha na ka mga punong barangay sa Bacolod City ang nagpositibo sa coronavirus disease 2019 (COVID-19).
Sa interview sang Bombo Radyo kay Association of Barangay Captains (ABC) President Lady Glez Gonzales Pallen, ginkumpirmar sini nga naggwa ang resulta nga nagpositbo sa balatian si Punong Barangay Ricky Mijares sang Brgy. Banago sang Sabado samtang sang Domingo naman si Punong Barangay Rodolfo “Boy” Pico sang Barangay Mansilingan.
Nahibaluan nga nagpositibo man ang 22 anyos nga bata ni Pico nga nagatrabaho man sa ciudad.
Gani nagpahanumdum si Pallen sa mga punong barangay nga kun may yara sang underlying conditions, matalana lang anay sang iban nga opisyal nga magtake-over sa iya samtang ini ang magahatag lang sang instructions virtually.
Gindugang man sini nga kun nagabatyag sang sintomas ang mga opisyal, gilayon nga magpakuha sang swab test kag mag-isolate.
Padayon man nga idisinfect ang mga barangay hall kag hugot nga iimplementar ang social distancing kag mga safety measures.
Nagapangayo man si Pallen sang kooperasyon sa mga pumuluyo kag indi na pagpaayawan ang mga opisyales sang barangay.
