c sa Amalis 1 kag tatlo ka balay sa Purok Katilingban, Barangay 40, Bacolod City ang ginpaidalum sa lockdown bangod nagpositibo sa COVID 19 ang pila ka mga pumuluyo
Suno kay Punong Barangay Elmer Villanueva, ang labing una nga nagpositibo sa barangay amo ang nagatrabaho sa Old City Hall nga residente sa Amalis 1.
Ginkuhaan ini sang swab sample sadtong Hulyo 29 apang wala nag-obserbar sang health protocol kag wala ginpahibalo sa barangay.
Suno kay Villanueva, kun nahibaluan nga ginpaidalum sa swab test, gilayon ini nga ginakunsiderar nga Person Under Investigation (PUI), apang wala sini ginreport gani wala nahimuan sang tikang nga mapaidalum sa quarantine.
Nahibaluan man nga nagasigi pa ini sang lagaw kag nagselebrar pa sang birthday sadtong Agosto 10.
Madamo naman ini sang nangin bisita kaangay sang mga kaupod sa trabaho kag mga abyan.
Tinalikdan nga Biyernes, ginpaidalum man sa swab test ang pamilya sini kag naggwa sa resulta nga nagpositibo man ang bata sang pasyente.
Suno kay Villanueva, wala pa ini magpahibalo nga nagselebrar sang kaadlawan kag nahibaluan nalang ang detalye sang magsugid ang abyan sini.
Ginatan-aw ang posibilidad nga sa trabaho sini nakuha ang virus.
Bangod sa pagpositibo sang empleyado sa Old City Hall kag bata sini, anum naman ka panimalay ang apektado kag ginpaidalum sa lockdown.
Nagdangat naman sa 22 ang ginswab nga kabahin sa na close contact sang mga nagpositibo kag ginatan-aw nga madamo pa kuntani apang ang iban ang wala nagasugid.
Samtang isa naman ka supervisor sa Rolling Hills Park ang nagpositibo sa virus nga residente sang Purok Katilingban, Barangay 10.
Ginapatihan nga nakuha man sini ang virus gikan sa trabaho.
Naglain ang pamatyag sang pasyente sadtong Agosto 13 gani ginkuhaan ini gilayon sang swab.
Nagwa naman ang resulta sang test nga positibo ang pasyente sang Agosto 15, kag ginswab naman ang bilog nga pamilya sang Lunes apang wala pa makagwa ang resulta.
Ang pasyente ang naka-home quarantine lang bangod may kaugalingon man ini nga kwarto kag banyo sa puluy-an kag wala sang ginabatyag nga sintomas.
Nagdangat naman sa tatlo ang kaso sang COVID-19 sa Purok Katilingban kag ginlockdown ang tagsa sini ka mga panimalay.
Isa pa sa mga ini ang senior citizen nga wala nagagwa sa puluy-an gani isa sa ginakatingala kun paano ini natapikan sang balatian.
