Nagpositibo sa COVID-19 si Punong Barangay Rosinie Distrito sang Barangay Singcang Airport, Bacolod City.
Santo sa Facebook post sang punong barangay kagab-i, naglain ang iya pamatyag sang Sabado gani gilayon ini nga nagpaidalom sa swab test upod ang iya asawa.
Kagab-i, naggwa ang resulta sini nga positibo sila nga duha sa coronavirus.
Ginpasiguro naman ni Distrito nga nag-isolate na sila nga daan matapos makabatyag sang sintomas sadtong Sabado.
Nagseparar naman sila sa ila apat ka mga kabataan kag pamilya para sa kahilwayan sang mga ini.
Ginpasalig man sang punong barangay nga padayon ang operasyon sang barangay.
Dugang pa sini nga wala sang dapat kahangaw-an ang iya mga pumuluyo bangud nga wala ini naka-contaminate sa barangay hall ukon sa mga barangay staff bangud nga nagapatigayon gid siya sang precautionary measures.
Padayon man karon ang contact tracing sa mga naka-upod ukon naka-closed contact sini.
Samtang, natalana nga magpaidalom sa swab test si Punong Barangay Rodney Carmona sang Barangay Sum-ag matapos ini ma-expose kag maka-close contact sa iya abyan nga nagpositibo sa coronavirus.
Santo man sa Facebook Post sang punong barangay, wala anay sang opisina sa ila nga barangay hall sugod subong nga adlaw para sa disinfection.
Magabalik ang operasyon sa ila nga opisina sa Lunes.
Nagpangabay man ini sa tanan niya nga na-closed contact nga mag-home quarantine lang anay samtang ginahulat ang iya nga resulta.
