Nagpaathag ang pinuno sang Department of Social Services and Development (DSSD) tuhoy sa ginaduso nga 3rd tranche sang Social Amelioration program (SAP) sa idalom sang Bayanihan to Recover as One Act ukon Bayanihan 2.
Suno kay Pacita Tero, ang third tranche sang SAP ang ginaduso para sa mga low income families kag mga pamalay nga may miyembro nga Overseas Filipino Workers (OFW) nga nagpauli bangud nadulaan sang trabaho.
Samtang, ginkompirmar man ni Tero nga natapos na ang validation sang mga nag-apply sa relief agad paagi sa text blast nga ginpatigayon sang National Telecommunications Commission (NTC).
Suno sa DSSD head, ginaverify pa nila ang mga nakaregister nga beneficiaries sang SAP nga naka-avail man sang ayuda nagikan sa Department of Labor and Employment (DOLE) kag Social Security System.
Suno sa DSWD Region 6, may yara na sang 12 mil ka mga benepisyaryo nga mahatagan sang cash assistance sa ciudad sang Bacolod apang ginahulat pa ang guidelines kag wala pa sang pat-ud kun san-o mahatag ang grant.
Nagpanawagan man si Tero sa tanan nga wala nakakuha sang cash assistance bangud nakalockdown sila sang tion sang distribution sang cash assistance nga sarang na nila ini makuha sa una nga semana sang Setyembre.
Apang ginahulat lamang nila ang guidelines sang mode of payment para sa mga beneficiaries.
Gin-athag man sini nga maagi sa gihapon sa barangay ang mga listahan sang beneficiaries.
