Patay ang manugbantay sa car wash matapos nga ginluthang sang duwa ka wala makilal-an nga persona nga sakay sa duwa ka motorsiklo sa Purok Sigay, Barangay 2, ciudad sang Bacolod alas-6:30 kagab-i.
Ang biktima ang ginkilala kay Eduardo Garcia, 48 anyos, residente sang nasambit nga lugar, kasado kag may tatlo ka kabataan.
Suno sa mga nakasaksi, nagbakal ang biktima sang sud-an nga inasal kag magapauli na kuntani sang iya nasugata ang mga suspetsado nga nagsakay sa motorsiklo.
Nag U-turn ang duwa ka motorsiklo kag gilayon nga nagdulog kag gintiro sa ulo ang biktima.
Nakahelmet naman ang isa ka suspetsado samtang nakabonnet kag long sleeve nga duag pula naman ang isa.
Gilayon sila nga nagpalagyo padulong sa norte nga bahin sang ciudad sakay sa motorsiklo nga wala sang plaka.
Gindapatan ang biktima sang first aid kag gindala sang katapo sang Bacolod Police Station 2 sa Riverside Medical Center bangod may vital signs pa ini.
Apang takna alas-8:45 sang gab-i, gindeklarar sang attending physician nga nagtaliwan na si Garcia.
Suno kay P/Capt. Leo Estopa, hepe sang Police Station 2, santo sa inisyal nga imbestigasyon, nakaagi na priso ang biktima kaupod sa iya nga utod may kaangtanan sa iligal nga droga.
Nakagwa ang mga ini sa prisuhan sadtong tuig 2016.
aaSa pagtan-aw sang mga kapulisan, malapit lang sa lugar ang nagapanag-iya sang isa ka motorsiklo gani daku ang posibilidad nga makilal-an kag madakop ang mga suspetsado.
Nagapadayun pa ang hot pursuit operation sang otoridad.
Samtang, suno naman sa utod sang biktima nga si Edmundo Garcia, nagbag-o na si Eduardo humalin sang naggwa sila sa prisuhan masobra tatlo ka tuig na ang nakaligad.
Suno diri, batasan gid man sang biktima nga madasig mangutos gani madasig man ini makakita sang kontra apang nagbag-o na ini sang nakagwa sila sa prisuhan.// Wala man ini sang may nahibaluan nga kaaway ni Eduardo.
Nahibaluan nga naga-buy and sell sang mga used oil ang biktima samtang nagabiyahe naman sang jeepney si Edmundo sa karon.
