Natalana nga magpagwa sang executive order ang gobernador sang probinsya sang Negros Occidental kag alkalde sang Bacolod angot sa ginaplano sang provincial government nga magpatuman sang “timeout weekend” humalin sa Agosto 28 tubtob Agosto 31 agud ipatuman ang mass testing para sa COVID 19.
Kaina sang aga, nagpatigayon sang joint press conference sanday Governor Eugenio Jose “Bong” Lacson kag Bacolod City Mayor Evelio Leonardia kag iban pa nga mga opisyales.
Suno kay Incident Management Team consultant Alfredo Benitez, 10 mil ka mga symptomatic patients kag ila nga close contacts ang igapaidalom sa swab test.
5,000 ang kuhaon sa syudad sang Bacolod sa Agosto 28 tubtub 29 samtang patigayunon man ang mass testing sa syudad sang Talisay, Silay, Bago kag sa banwa sang Murcia sa Agosto 30 tubtub 31.
Ginalantaw man nga 2,500 test ang masarangan sang lima ka mga molecular laboratories sa syudad sang Bacolod kag probinsya sang Negros Occidental agud masiguro nga may yara na sang resulta sa sulod sang 24 oras.
Suno kay Benitez, tinutuyo sang tikang nga malimitahan ang paghulag sang publiko sa sulod sang apat ka adlaw samtang nagapatigayon sang mass testing sa mga pasyente nga may sintomas sang virus.
Nagpasalig naman si Leonardia kag Lacson nga magabuligay ang siudad kag probinsya sa pagpatigayon sang lockdown para masiguro nga mangin epektibo ang mass testing.
Suno kay Benitez, ginapropose sini ang time-out weekend bangud subong nga semana, madamo ang nagpositibo sa probinsya kag sa syudad sang Bacolod.
Kinahanglan man suno sa iya nga maghimo sang tikang agud malikawan ang magpareho ang probinsya kag syudad sa natabo sa Cebu.
Nagtambong man sa joint press conference sanday Provincial Administrator Rayfrando Diaz; Silay City Councilor Ryan Gamboa; Bacolod City Vice Mayor El Cid Familiaran kag Bacolod City Councilor Renecito Novero.
