Nagreklamo sa Bombo Radyo ang pila ka mga pumuluyo sa Purok Mainuswagon, Barangay Alijis, Bacolod City bangud wala nagpatigayon sang public hearing ang mga barangay officials angot sa ikaduha nga cell site nga ipatindog sa lugar.
Suno kanday Fernan kag Johnny Benjamin, wala sila ginpatawag agud konsultahon kun pabor sila sa pagpatindog sang cell site sang Dito Telecommunity Corp sa lugar.
Sang Huwebes, nagkadto sa lugar ang pila ka mga Chinese nationals kaupod ang backhoe bangud magasugod na kuntani sila sang construction.
Suno kanday Benjamin, gin-abisuhan sila sang nagbakal sang duta nga manokan ang patindugon sa lugar kag wala nalang nila nadiskubrehan nga cell tower ang tukuron.
Bangud sini, ginbalabagan nila ang backhoe gani wala nadayon ang pagsugod sang construction.
Ginreklamo man sang mga ini ang indi pagsunod sang mga Chinese sa health protocol kun sa diin wala sila sang suksok nga facemask sang nagkadto sa lugar.
Suno kanday Benjamin, wala sila nagapamatok sa pagtindog sang cell tower kundi sundon lang ang husto nga proseso kun sa diin ginpamatian man ang ila sentimyento.
Sa kaangot nga balita, nagpanindugan ang punong barangay sang Barangay Alijis, Bacolod City nga wala na sang patigayunon nga public hearing antes hatagan sang barangay clearance ang pagpatindog sang cell site sa Purok Mainuswagon.
Sa interview sang Bombo Radyo Bacolod kay Punong Barangay Deogracias Dela Vega, ginasunod nila ang memorandum circular sang Department of the Interior and Local Government (DILG).
Suno kay Dela Vega, nagmando ang DILG nga indi dapat madelay ang pagpatindog sang cell site bangud siya ang mangatubang sang kaso nga abuse of authority kun indi mahatag ang barangay clearance sa sulod sang tatlo ka adlaw.
Ang telecommunications company suno kay Dela Vega nga nagapanag-iya sang cell site ang may yara sang kompleto nga mga dokumento.
Nahibaluan nga ginpanubuan na ang mga requirements sang mga mapatindog sang cell site kag ini ang ginlakipan sang barangay clearance; documentary requirements para sa building permit applications on common towers kaangay sang Unified Application Form para sa Locational Permit, Fire Safety Evaluation Certificate, Building Permit, property documents (owners/authorized occupants sang Registered/Untitled lands, authorized occupants sang registered land, kag pila ka mga ancillary permit kag accessory permits requirements.)
Wala naman nagakinahanglan sang permiso sang mga home owners, mga pumuluyo kag iban pa sa pagpatindog sini.
Suno kay Dela Vega, malayo ang balay sang mga nagareklamo sa patukuran sang cell site.
Ginpasalig man sini nga handa siya mamati kun may yara sang magakadto sa iya agud magpadangat sang mga reklamo.
