Aminado ang gobernador sang Negros Occidental nga wala nila natalakay sa ginpatigayon nga joint meeting sang provincial government upod ang mga opisyales sa ciudad sang Bacolod kun may yara sang ayuda nga igahatag ang kada local government units (LGUs) kadungan sa pagpatuman sang time-out weekend.
Nahibaluan nga sa Agosto 28 tubtob 29, naka-lockdown ang Bacolod agud magpatigayon sang mass testing samtang sa Agosto 30 tubtob 31 naman naka-lockdown ang mga ciudad sang Talisay, Silay, Bago kag banwa sang Murcia.
Sa exclusive interview sang Bombo Radyo Bacolod kay Negros Occidental Governor Eugenio Jose “Bong” Lacson, ginpahayag sini nga ila nangin prayoridad sa sinapol amo ang pagpatigayon sang mass testing kag kun kanday sin-o ang dapat nga itest.
Apang, wala nila natalakay kun paano ma-manage ang mga ginatawag nga “Remedyo Heneral” nga mga pumuluyo.
Suno kay Lacson, dapat magahimo sang estratiya ang mga LGUs angot sa ayuda nga pwede mahatag sa mga ” poorest of the poor” nga mga pamilya.
Dugang pa sang gobernador nga two-day lockdown man lang ang matabo sa kada LGU kag indi man two-week lockdown.
Indi naman ini makapasalig kun may yara nga ihatag nga ayuda ang tagsa ka mga LGU bangud suno diri, nakadepende na ini sa mga local officials.
Gin-athag naman sini nga magapabilin nga unhampered ang dalagan sang mga goods kag essential services. Samtang,
Tinutuyo ni Negros Occidental Governor Eugenio Jose “Bong” Lacson nga makapatigayon sang coronavirus testing sa kapin 60 mil ka mga Negrosanon.
Sa exclusive interview sang Bombo Radyo Bacolod kay Lacson, suno diri santo sa pahayag sang Department of Health (DOH), dapat maka-test ang kada local government unit (LGU) sang 2 porsyento sang populasyon tubtob sa bulan sang Disyembre sini nga tuig.
Ginabanta nga sa probinsya sang Negros Occidental, dapat mapaidalom sa swab test ang 52 mil ka mga persona.
Suno kay Lacson, ginatuyo sang provincial government nga kapin 60 mil ka mga Negrosanon ang ma-test tubtob sa katapusan sang tuig.
Gin-athag man sang gobernador nga amo ini ang rason kun ngaa magapatigayon sang time-out weekend.
Nahibaluan nga sini nga Agosto 28 tubtob Agosto 31, may yara sang tag two-day lockdown sa mga ciudad sang Bacolod, Talisay, Silay, Bago kag banwa sang Murcia.
Suno kay Lacson, sa pagkadason nga weekend, lain naman nga mga LGUs ang magapatigayon sang time-out weekend agud nga makapangita sang mga symptomatic patients kag ma-swab test.
Sa karon, ginahulat pa sini kun ano nga mga LGUs ang nakahanda na sa mass testing para masunod naman nga semana.
Dugang pa sang gobernador, dapat gid mahibaluan kun ano nga mga lugar ang may madamo nga local cases agud nga mapunggan sang mas timprano ang pagdamo sini.
Sa karon, nagadangat na sa 26 mil ka mga Negrosanon ang napaidalom sa swab test kun sa diin masobra sa 900 ang nagpositibo kag kalabanan amo ang mga returning overseas Filipino (ROFs) kag locally stranded individuals (LSIs).
