Aminado ang chairman sang quarantine centers action team sang ciudad sang Bacolod nga may mga hotel nga nagbalibad nga magbaton sa mga repatriated overseas Filipino workers bangud wala pa gihapon nakabayad ang Overseas Workers Welfare Administration (OWWA) sang bill.
Sa interview sang Bombo Radyo Bacolod kay Atty. Renecito Novero, gin-athag sini nga indi macontrol sang syudad ang pagpapauli sang mga returning Overseas Filipino Workers (OFW) bangud ang makokontrol lang sa pagpadala sa ila sa probinsya amo ang national Inter-Agency Task Force (IATF) kag ang OWWA.
Suno kay Novero, nakapadala na sila sang sulat sa national IATF nga hatagan sila sang advanced information bisan duha lang ka adlaw antes ang flight agud mahanda man ang tiniran sang mga ini kag malikawan kuntani ang kasubong sa natabo sa mga returning OFWs kahapon.
Nagapati man ini nga wala sang nagakaigo nga koordinasyon ang OWWA sa mga LGUs gani nastranded ang mga OFW sa airport kag wala nasugat gilayon.
Nagakahangawa man ang konsehal nga wala na sang mga hotel nga mag-accommodate sa mga OFW bangud wala pa nakabayad ang OWWA sang bill.
Suno diri, may yara na sang mga hotel nga nakig-angot sa iya nga indi na magbaton sang OFW bangud wala pa nabayaran kag wala na sang gamiton nga iban sa mga service crew.
Madumduman nga kapin P17.5 million ang balayran sang ahensya sa mga hotel sa syudad apang indi pa matumod kun pila ang bilin sa karon.
Ginhingyo man sang syudad nga mahatagan pa sila sang extension sa moratorium agud mahatagan sang ligwa ang OWWA nga mabayaran ang mga hotels apang wala sila ginpamatian.
