Nagapanguna ang probinsya sang Negros Occidental sa may pinakamadamo nga nakompiskar nga illegal nga druga subong nga tuig kag ginasundan sang probinsya sang Iloilo, Capiz, Aklan kag Antique, santo sa drug seizure report sang Philippine Drug Enforcement Agency (PDEA) Regional Office 6.
Sa interview sang Bombo Radyo Bacolod kay PDEA Region 6 spokesperson Graziella Tanaleon, santo sa seizure report sang ahensya, nagdangat sa 5, 537.70 grams sang suspected shabu kag 11.46 grams sang marijuana ang nakompiskar sa probinsya sang Negros Occidental.
Suno kay Tanaleon, kun basehan ang standard nga value sang illegal nga druga nga gintalana sang Dangerous Drugs Board, ang presyo kada gramo ang P6,800.
Kun imultiply ini sa 5,537.70 grams, sarang nga magdangat sa masobra P30 million ang balor sang nakompiskar nga iligal nga druga.
Samtang sa probinsya naman sang Iloilo, nagdangat sa 1,059.50 grams ang nakompiskar nga suspected shabu kag nagabalor sang kapin P6 million.
Ginpahayag man ni Tanaleon nga may yara pa sang 27 ka mga drug buy bust operations nga wala pa nakapasa sang progress report.
Suno sa PDEA 6 spokesperson, wala man sang kompirmado nga laboratoryo sang shabu kag plantasyon sang marijuana sa probinsya sang Negros Occidental, santo sa pahayag ni PDEA Director General Wilkins Villanueva.
