Ginkumpirmar sang pinuno sang Incident Management Team sang Negros Occidental nga nagpadala sang sulat ang probinsya sa regional inter-agency task force against COVID-19 nga nagahingyo sang pagpauntat sa pagsulod sang mga locally stranded individuals (LSI) kag returning overseas Filipino (ROF) kadungan sang patigayunon nga lockdown kag mass testing sa Agosto 28 tubtob Agosto 31.
Sa interview sang Bombo Radyo kay Dr. Zeaphard Gerhart Caelian, ginpahayag sini nga naghingyo ang probinsya sa RIATF nga untaton anay ang pagpasulod sang mga LSI kag ROF sa Negros Occidental bilang preparasyon sa ginapropose nga mass testing.
Suno kay Caelian, tinutuyo sang apat ka adlaw nga ginaayo nga moratorium nga mabakantehan ang mga quarantine facilities para sa mass testing. Samtang, Nag-apelar man si Mayor Evelio “Bing” Leonardia sa national inter-agency task force nga suspendihon ang pagpapauli sa mga Bacolodnon nga OFW kag LSI until further notice nagikan sa ciudad.
Suno kay Leonardia, ini bangud sa padayon nga nagasaka nga numero sang locally transmitted infections sa Bacolod.
Nahibaluan nga halin Agosto 16 tubtob Agosto 23, nagsaka sang 75% ukon 900 ka mga kaso halin 513 ang numero sang local transmission sa ciudad.
Magluwas diri, ginakulang ang bed capacities subong man ang mga doktor kag nurses.
Isa man sa mga rason ang palaabuton nga mass testing sa Agosto 28 tubtob Agosto 31 kun sa diin sa 5,000 ka mga pumuluyo ang ipaidalum sa test sa ciudad, may 500 nga posible nga magpositibo.
Kahapon, nagpadala man ang alkalde sang emergency kag urgent appeal kay Presidente Rodrigo Duterte nga nagahingyo nga magpadala sang augmentation team nga ginalakipan sang 150 ka mga nurses, 20 ka mga doktor kag 30 ka mga medical technologist nagikan sa Department of Health para sa Bacolod City bilang “emergency stop-gap measure” antes pa man ma-bag down ang health care system sang ciudad bangud sa coronavirus pandemic.
Subong nga aga, ginpahayag sang Bacolod City Public Information Office nga nagpatunda si Senator Christopher ‘Bong’ Go nga mapadala si Presidente Duterte sang tatlo ka opisyales nga magasapol kay Leonardia agud istoryahan kun ano ang sahi sang bulig nga kinahanglan sang ciudad.
