Ginkumpirmar ni Bacolod City Police Office (BCPO) director P/Col. Henry Biñas nga na-closed contact sang personnel sang Philippine Drug Enforcement Agency (PDEA)- Negros Occidental nga positibo sa COVID-19 ang duha ka mga priso sang Bacolod Police Station 3 nga nagpositibo man sa balatian.
Sa interview sang Bombo Radyo Bacolod kay Biñas, ginpahayag sini nga ang PDEA-Negros Occidental ang nakadakop sa duha ka mga gina-alegar drug personalities sa buybust operation sa Brgy. Banago, Bacolod City, pila na ka semana ang nakaligad.
Ginapahayag nga Agosto 12 gindakop ang mga suspetsado kag nakuhaan sang iligal nga druga.
Suno sa city director, matapos nahibaluan nga positibo sa coronavirus ang PDEA agent, gilayon nga gin-isolate ang duha sa pihak nga selda nga ginpalibutan sang plastic.
Ginpaidalom man ang mga ini sa swab test lakip na ang mga upod nila nga priso.
Apang sang Lunes sang gab-I, naggwa ang resulta kag duha lang sila ang nagpositibo sa virus.
Gilayon sila nga gindala sa quarantine facility sang ciudad sa Barangay Mansilingan.
Suno kay Biñas, ginahulat pa sa karun sang Bacolod Police Station 3 ang abiso nagikan sa City Health Office kun ano ang himuon nila matapos nga nagpositibo ang duha ka mga detainees.
Suno sa iya, sundon gid nila ang abiso sang mga medical experts.
Nagpanugyan naman ini sa mga kapulisan nga protektahan ang pamilya paagi sa pagprotekta sang tagsa ka kaugalingon.
