Pagpangawat ang ginalantaw sang mga kapulisan nga motibo sa pagpatay sa isa ka 55-anyos nga maestra sa ciudad sang Himamaylan.
Sa interview sang Bombo Radyo kay Police Lt. Alfred Mansoy, deputy chief sang Himamaylan City Police Station, ginkilala ang biktima kay Cecilia Adurador, isa ka manunudlo sa Agisan Elementary kag residente sang Purok 10, Brgy. Agisan, Himamaylan City.
Suno kay Mansoy, natingala ang hinablos ni Adurador kun ngaa alas 2:00 na sang hapon apang wala pa ini nakabangon gani iya ginkadtuan ang balay sini.
Suno diri, nagaisahanon nga nagaistar sa iya balay ang biktima.
Bangud indi maabrehan ang puertahan, ginguba ini sang iya hinablos kag iya nasapwan si Adurador nga nagahamyang sa salog, may pilas kag dugo sa ulo, kag wala na sang kabuhi.
Suno sa deputy chief, posible nga pagpangawat ang motibo sa krimen bangud nagaukay ang mga kagamitan sa balay kag sa bintana sa second floor nag-agi ang mga suspetsado.
Ginpahayag man ni Mansoy nga may yara na sila sang duha ka mga persons of interest apang sa karun, nagapadayon pa ang ila imbestigasyon.
