Nag-abot na sa syudad sang Bacolod ang 12 ka military health workers nga ginpadala nagikan sa Cebu agud magdugang sa pwersa sang mga healthcare workers sa Bacolod matapos nga nagpadala sang sulat si Mayor Evelio “Bing” Leonardia nga nagapangayo sang bulig sa national government.
Sa pagsinapol sang mga city officials kag sang team nga ginpadala ni Presidente Rodrigo Duterte kahapon, ginpahayag ni Presidential Assistant for the Visayas Michael Lloyd Dino nga may 12 ka military health workers nga maga-augment sa ciudad kag subong nga adlaw magaabot ang una nga batch.
Sa interview sang Bombo Radyo Bacolod kay Army Major Cenon Pancito III, spokesperson sang 3rd Infantry Spearhead Division, ang pagpadala sang military medical personnel ang kabahin sang promisa ni Lt. Gen. Roberto Ancan, commander sang Central Command sang Philippine Army nga magpadala sang tropa nagikan sa Cebu.
Ang Central Command ang may sakop sa train service military actions para sa bug-os nga Visayas.
Bilang pagtuman sa pangako sini nga magpadala sang bulig sa Bacolod, nag-abot na ang dose ka mga medical personnel nga ginalakipan sang duha ka doctora; apat ka mga nurses; kag anum ka mga medical aids.
Suno kay Pancito, ang military medical personnel ang tungaon kag ibutang sa Bacolod Queen of Mercy Hospital kag Riverside Medical Center.
Suno diri, ang militar ang legally kag morally willing sa paghatag sang serbisyo agud makabulig sa pagtapna sang COVID-19.
Suno kay Pancito, nakadepende man sa Local Inter-Agency Task Force (IATF) ang deployment sang military medical personnel kag nakadepende man sa Local Government Unit (LGU) kun iquarantine pa ang mga ini ukon magaderecho nalang sa pag-ubra sa mga hospital.
Nagpanawagan man ini sa iban nga mga ahensya sang gobyerno nga ini na ang husto nga tion agud magbuligay sa pagsolbar sang ginapangatubang nga pandemya.
