Naga-apelar ang isa ka public utility jeepney (PUJ) driver nga kun may pasahero nga nagabayolar sa mando nga pagsuksok sang face shield sa sulod sang salakyan, ini ang dapat hatagan sang penalidad kag indi ang driver.
Kahapon, nagpadulong sa estasyon sang Bombo Radyo si Hernani Taganili, isa ka jeepney driver sa Bacolod, matapos gindakop kag ginhatagan penalidad bangud may isa ka pasahero nga nagsakay diri nga wala nagasuksok sang face shield.
Suno kay Taganili, wala sini natalapungdan nga wala sang face shield ang isa ka pasahero sang nagsaka ini sa iya nga jeep.
Ila na lang ini nakit-an sang nakapungko na, gani iya ini ginsaway kag ginhambalan nga magsuksok sang face shield.
Bangud ginpahayag sang pasahero nga wala ini sang faceshield, ginpahigad ni Taganili ang jeep agud makapanaog ang nasambit nga pasahero.
Apang nakit-an ini sang mga nagabantay nga otoridad sa unhan gani sang naglabay na ang jeep ni Taganili sa San Juan Street, ginpapundo ini kag gindakop.
Naghingyo ini sang konsiderasyon kag gin-eksplekar ang sitwasyon apang wala ini ginpamatian sang mga enforcer apisar nga may isa ka pasahero nga nagpamatuod nga wala sang sala ang driver.
Gani, nagaapelar si Taganili nga kun wala gid man nagatuman sa protocol ang mga pasahero, sila kuntani ang multahan kag indi ang mga drivers.
