Nagdangat na sa 22 ang mga doktor kag nurses nga ginpadala sa ciudad sang Bacolod bilang sabat sa problema sang ciudad angot sa kakulang sang mga medical personnel.
Suno sa kumpirmasyon ni Bacolod City Lone District Congressman Greg Gasayata, nagtawag ini kay Department of Health 6 Regional Director Marlyn Convocar angot sa pagkapuno sang mga hospital beds kag ang pagresign sang mga medical personnels kasubong man ang hinali nalang nga pag absent without leave (AWOL).
Ginsapol sini ang pampubliko kag pribado nga mga ospital nga sakop sang ciudad gani gilayon nga nagcommit ang tagsa ka ospital nga magdugang sang bed capacity para sa mga COVID patients nga nagdangat sa 98.
Apisar sa pagdugang sang bed capacity nga magacater sang mga pasyente nga natapikan sang COVID, daku naman nga problema ang kakulang sang medical practitioner.
Sabat sa panawagan ni Bacolod City Mayor Evelio Leonardia kay President Rodrigo Duterte nga augmentation sang dugang nga medical personnel una na nga nag-abot sa ciudad ang pulo ka mga medical pesonnel sang Huwebes kag gindeploy sa Corazon Locsin Montellibano Memorial Regional Hospital (CLMMRH).
Samtang 12 naman ang nag-abot nga mga military doctor kahapon nga natalana nga iga-deploy sa mga pribado nga ospital sa Bacolod.
Nahibaluan nga commitment sang DOH kag National Government ang pagpadala sang human resource para sa health program.
Bangod sa pag-abot sang mga dugang nang health care personnel, magasugod naman ang paghatag sang gindedicate nga bed capacity.
Ginpasalamatan naman ni Gasataya sanday Regional Director Convocar kag ang National Government sa gilayon nga pagpalab-ot sang bulig.
