Sang Huwebes pa nagsugod na sa Mass Testing ang probinsya sang Negros Occidental kasubong man sa ciudad sang Bacolod.
Suno kay Provincial Administrator Atty. Rayfrando Diaz, nakahanda na ang mga ini sa mass testing kag ginkumpirmar sini nga sang nasugudan na ang pagpatuman.
Suno kay Diaz, ginsapol sini ang pinuno sang apat ka mga imbulbado nga departamento sang Huwebes kaangay sang head sa Molecular Laboratory, Head sang City Health Office nga incharge sa swabbing, ICTD nga maga encode sang mga case investigation form sa mga nakuhaan sang swab test kag ang head sang Disaster Management Team nag si Incident Management Commander Dr. Zeaphard Gerhart Caelian.
Suno kay Diaz, nagsugod Agosto 27 ang mass testing kag kahapon ang ikaduha na sini nga adlaw sang pagpatuman.
Ginakalipay naman sini nga 2,730 na ang kabug-usan nga napaidalum sa mass tesing sa sulod sang duwa ka adlaw kun sa diin 1,301 sang Huwebes samtang 1,429 naman ang kahapon nagikan na sa mga establishimento, kag ahensya sa ciudad sang Bacolod kag probinsya sang Negros Occidental.
Nagalaom naman ini nga bwas magadamo pa ang turn-out sang mapaidalum sa swab test kag malab-ot ang natalana nga lima ka libo sa Bacolod. Samtang, nalipay si Department of Environment and Natural Resources (DENR) Secretary Roy Cimatu sa effort sang Provincial Government sang Negros Occidental sa pag-atubang sang COVID-19 crisis.
Suno kay Provincial Administrator Atty. Rayfrando Diaz, gin-istoryahan ang mga tikang nga pagahimuon sa pag-atubang sa COVID-19 sa nangin meeting sang Miyerkules kaupod kay Cimatu.
Ginpadangat naman sini nga ginapasangkad pa ang bed capacity sa Cadiz City District Hospital agud nga magdangat sa masobra 100 para sa mga nagakinahanglan sang ospital.
Samtang may malab-ot 900 naman nga bed capacity ang may-ara sa mga quarantine sites nga para sa mga mild symptoms nga kaso sang COVID-19,samtang 900 man ang natalana para sa mga locally stranded individual (LSI) nga maga-abot sa probinsya samtang nagahulat sang resulta sang RT-PCR test.
Nagapati ini nga nalipay ang DENR head sa Provincial Government kag naghatag pa ini sang promisa sa pagdugang sang 10,000 nga test kit para sa molecular laboratory sa Teresita Jalandoni Provincial Hospital.
Ini agud nga makareplenish sa mga test kit nga advance nga gingamit sang probinsya para sa ginapatigayon nga mass testing.
