Nagapati ang tagpamaba sang Bacolod City Police Office (BCPO) nga 90 tubtob 95 porsyento nga epektibo ang ginapatuman nga “four-day no movement” sa ciudad sang Bacolod.
Sa interview sang Bombo Radyo Bacolod kay BCPO spokesperson P/Lt. Col. Ariel Pico, ginpahayag sini nga santo sa ila assessment sa una nga adlaw sang “four-day no movement”, gamay lang nga mga pumuluyo ang nagagwa sa ila mga puluy-an nga ginapatihan mga essential workers ukon may importante nga balaklon.
Dugang pa sini nga mas maayo nga wala sang home quarantine pass bangud nga nakatuon na sang leksyon ang ciudad sadtong ginpaidalom sa enhanced community quarantine ang Bacolod kun sa diin ginapa-duplicate sang mga pumuluyo ang HQP.
Suno kay Pico, daw kaangay lamang sang modified ECQ ang ginapatuman subong bangud nga may yara sang public transportation sa gihapon apisar pa nga ginpasiraduhan ang mga merkado.
May yara naman sang walo ka mga outer border control check-up points kag 27 ka mga inner border control check-up points nga ginpahamtang sa ciudad agud makontrol ang paggwa kag pagsulod sa Bacolod.
