Nagpasar sang dugang nga realignment kag relocation sa pondo sang ciudad sang Bacolod para magamit sa COVID-19 response.
Suno kay Bacolod City Vice Mayor El Cid Familiaran, P113 million ang budget nag igaseparar sa mga request sang nagkalainlain nga ahensya sang ciudad.
Ang pondo ang nagikan sa mga local sources nga programa nga wala paman ginadalian nga buhatun gani pagagamitun anay para sa pag-atinder sa problema tuga sang COVID pandemic.
Madasig naman ini nga gin-aprubahan sang Sangguniang Panlunsod bangod nakita nga kinahanglanun ini sang ciudad.
Suno kay Familiaran, ang P22 million ang magakadto sa City Health Office (CHO), ang P28 million ang magakadto sa City Engineers Office, ang P32 million ang magakadto sa City Disaster Risk Reduction Management Office (CDRRMO) samtang ang P30 million naman ang magakadto sa Department of Social Services and Development (DSSD).
Ginkumpirmar naman sang bise alkalde nga makasarang pa ang pondo sang ciudad.
Ginpaathag man ni Familiaran nga sa paga cash advance sang pondo, obligado man ini nga e-liquidate.
Mangin subject ini sa Accounting and Auditing Procedure gani ang magbayolar kag magpagwa sang pondo nga wala ma-liquidate ang may paga-atubangon nga salabtun.
