Walo ka .45 calibre pistol ang nakumpiskar sang Escalante City Police Station sa isa ka wing van nagikan sa Cebu nga naintercept sa isa ka checkpoint sa ciudad sang Escalante kahapon.
Sa interview sang Bombo Radyo kay Police Major Gil John Despi, hepe sang Escalante City Police Station, ang nasambit nga wing van ang ginamaneho ni Juanito Chua, 53 anyos, residente sang La Granja, La Carlota City.
Suno kay Despi, may unod nga feeds para sang baboy ang wing van nga ginamaneho ni Chua apang sang ila gintsekyar ang driver’s seat, may pito ka calibre .45 nga nakaputos kag isa nga nakasab-it sa kilid sa suspetsado.
Suno sa hepe, nakabaton ang mga ini sang impormasyon nga may yara sang isa ka persona nga illegal nga nagabaligya sang armas luthang gani hugot sila nga nagbantay sa checkpoint.
Ginpanginwala naman ni Chua nga siya ang nagapanag-iya sang mga armas luthang kag nagpanindugan nga ginpadala lang ini sa iya.
Sa karun, gina-imbestigahan pa sang kapulisan kun diin sini ginkuha ang mga firearms kag kun diin niya ini kuntani pagadal-un.
