Apisar nga makabig bilang madinalag-on ang ginpatigayon nga mass testing sa ciudad sang Bacolod, aminado si Vice Mayor El Cid Familiaran nga may yara gihapon sang kabudlayan nga gin-agyan bangud iban nga mga COVID-19 testing laboratory nga nagpamalibad nga magbaton sang swab samples.
Nahibaluan nga kalakip sa mga nagpakigbahin kuntani nga mga biolab amo ang Teresita Lopez Jalandoni Provincial Hospital sa ciudad sang Silay, Red Cross laboratory, Doctor’s Hospital kag Bacolod Queen of Mercy Hospital.
Sa interview sang Bombo Radyo Bacolod kay Familiaran, chairman sang inter-agency task force againts coronavirus sa ciudad, ila karon naproblemahan bangud nga may iban nga mga biolab nga nag-backout bangud nga indi sila accredited sang PhilHealth.
Nahibaluan nga refundable ang COVID test sa PhilHealth.
Suno diri, plano nila karon nga ipadala ang iban nga swab samples sa mga biolab sa Iloilo.
Natalana man nga magpadala sang sulat si Mayor Evelio “Bing” Leonardia kay Sen. Richard Gordon nga chairman sang Red Cross, agud nga magpangayo sang pahanugot nga batunon sang biolab sang Red Cross ang iban nga mga swab samples.
Ginkumpirmar naman ni Familiaran nga 85% ang na-swab sa 5 mil nga target sang city government.
Madumduman nga kabug-usan nga 4,384 specimens lamang ang nakolekta sa ginpatigayon nga mass testing sa nagkalain-lain nga barangay humalin sang Agosto 27-29.
Ginpasalig man ni Familiaran nga sa sulod sang duha tubtob tatlo ka adlaw, mahimo na maggwa ang test results sang mga nagpartisipar sa mass testing.
Gin-athag man sini nga dal-on gid sa quarantine centers ang mga magpositibo kun indi kwalipikado ang ila mga puluy-an para sa home quarantine.
Ginkumpirmar man sang bise alkalde nga nagpasalig man ang ciudad sang Silay nga may yara sila sang 500 beds nga ginreserved para sa mga Bacolodnon.
