Gin-athag ni Bacolod City Vice Mayor El Cid Familiaran nga wala pa mabakal ang vitamins nga plano iprocure sang city government.
Madumduman nga ginakwestyon ni Councilor Wilson “Jun” Gamboa Jr. ang plano nga pagbakal sang ciudad sang Bacolod sang isa ka botelya sang Vitamin C with Zinc nga nagabalor sang P2,500.
Sa interview sang Bombo Radyo Bacolod kay Familiaran, gin-athag sini nga alokasyon pa lamang ang gin-aprubahan kag wala ini nagakahulugan nga nabakal na ukon amo gid ina ang bili sang vitamins.
Suno sa bise-alkalde, isa man sa nagboto nga “yes” sa amo nga plano si Gamboa.
Kuntani, nag-object ang konsehal sa amo nga plano bangud yara man ini sa session.
Dugang pa ni Familiaran nga kuntani ginhulat niya anay nga nabakal na ang vitamins kag dira magsiling nga “overpriced” ini kag pasakaan sang kaso ang responsable.
Apang suno sa bise-alkalde, wala pa ma-consumate ang amo nga plano bangud budget allocation pa lang ang may yara.
Nahibaluan nga P113 million ang gin-aprubahan nga pondo para diri.
Lakip sa mga nag-request amo ang City Health Office, City Disaster Rirsk Reduction and Management Office, City Engineer’s Office kag Department of Social Services and Development.
