Nagpangabay sang suporta kag kooperasyon sang mga pumuluyo ang alkalde sang Bacolod City sa mga polisa may kaangtanan sa pagkontrolar sang giho sang mga pumuluyo nga iga-implementar sa Setyembre 3 tubtob Setyembre 15.
Sa statement nga ginpagwa ni Mayor Evelio “Bing” Leonardia kaina sang kaagahon, ginpahayag sini nga bangud sa padayon nga pagsaka sang mga kaso sang COVID-19 sa ciudad kag kakapoy sang mga doktor kag nurses, nagpangabay ang mga ini nga mahatagan ligwa kag mangita sang measures agud maibanan ang giho sang mga pumuluyo.
Suno kay Leonardia, sa pagsinapol nga ginpatigayon kaupod ang mga opisyales sang ciudad, doctors, church leaders, business leaders kag mga managers, nakasugtan nga ibalik ang Home Quarantine Pass system kun sa diin kada panimalay ang pagahatagan sang isa ka HQP pass.
Apang suno sa alkalde, kun sang una isa lang ka ngalan ang ibutang, sa karun, apat ka mga persona ang sarang nga mabutang diri apang one at a time lang ang mga ini nga makagwa.
Nagapati ini nga ang epektibo ang pagbalik sang HQP pass sa pagkontrol sang giho sang mga tawo sa Bacolod.
Gindugang man sang alkalde nga ibalik man ang border control checkpoints sa mga boundaries sang Bago, Murcia kag Talisay kag ang mga may valid nga rason kag essential needs lang ang pasudlon sa ciudad.
Suno kay Leonardia, may yara man mga exemptions nga ihatag kag padayon gihapon nga pasudlon ang mga goods, services, essentials kag supplies.
Suno diri, Setyembre 3 ang target date nga ini ang maimplementar kadungan sang quarantine status nga mangin epektibo tubtob Setyembre 15.
