Ginkilala ni Presidente Rodrigo Duterte ang present-day heroes ilabi na ang mga frontliners nga nagabulig agud nga matapna ang paglapta sang coronavirus disease sa pungsod kadungan sang National Heroes Day subong nga Agusto 31.
Sa video message nga ginpakita kadungan sang pagdumdom sang National Heroes Day sa Libingan ng mga Bayani kaina sang aga, nagaupod si Duterte sa pagdumdom sang adlaw sang mga baganihan.
Aminado ini nga indi lang ang mga nagkalamatay nga baganihan nga nakig-away batok sa mga dumuluong ang ginahatagan sa karon sang pagkilala kundi ang heroism sang mga nagrisgo sang ila kabuhi agud awayon ang lain nga kaaway.
Suno diri, sa karun nga mga tinion nakit-an ang importansya sang mga modern day heroes diri sa Pilipinas kag sa luwas sang pungsod.
Gin-engganyo sang presidente ang publiko nga mangin inspired sang kaisog sang mga Filipino heroes agud nga may maayo nga palaabuton para sa tanan nga mga Pinoy.
Sa separado nga mensahe, ginpahayag sang chief executive nga nagalaom ini nga may inspirasyon ang mga Pilipino nga panindugan ang demokrasya kag awayon ang tanan nga pamahog sa kahilwayan kag soberanya.
