Ginahulat nalang ang desisyon sang Bacolod City Health Office agud nga makapauli na ang mga returning OFWs nga nakaquarantine sa karon sa mga hotel sa ciudad, naswab test man sila ukon wala.
Ini ang kasunod sang bag-o nga pagsulundan nga ginpagwa sang national inter-agency task force nga indi na magpaidalom sa 14-day quarantine ang mga returning overseas Filipinos nga maayo ang kondisyon sang ikaayong-lawas kag may negatibo nga RT-PCR test halin sa Manila.
Sa interview sang Bombo Radyo kay Bacolod City Councilor Renecito Novero, chairman sang quarantine centers action team, may mga OFWs nga wala naswab test bangud may yara sang technical problem ang molecular lab sang probinsya kag indi na magbaton sang swab sample ang Corazon Locsin Montelibano Memorial Regional Hospital (CLMMRH).
Bisan Agusto 19 ang guidelines sang NIATF suno sa konsehal, sakop man sini gihapon ang mga OFWs nga nagpauli halin sang Agusto 22 kag nagahulat sa karon sa mga hotels.
Nagapati ang pinuno sang QCAT nga may kaayuhan kag may dala man nga risgo ang bag-o nga pagsulundan nga ginpagwa sang national Inter-Agency Task Force (IATF).
Suno kay Novero, makakinot ang Overseas Workers Welfare Administration (OWWA) sa mga galastusan; mabuhinan ang kabudlayan sang mga Local Government Units sa pagdul-ong kag pagsugat sa mga ROF; kag mareserve ang mga molecular laboratories sa syudad.
Apang ang risgo suno diri kun nagnegatibo man ang resulta sang swab test sang ROF sa Manila apang naglagaw ini anay antes magpauli sa syudad bangud sarang nga magpositibo ini sa COVID-19.
Suno diri, dapat nga madasig ang paggwa sang resulta kag papaulion gilayon ang mga ini kun negatibo na man lang ang resulta sang swab test.
Ginpahayag man sini nga isa ini ka tikang nga ginahimo sang gobyerno agud nga mabuhinan ang gasto sang OWWA sa mga ROFs.
Nagpanawagan man ini nga kinahanglan man nga intiendihon sang mga pumuluyo ang nasambit nga ahensya bangud mahimo man maubos ang pondo.
