Ginpasalig ni Negros Occidental District Jail Warden Jail Chief Inspector Norberto Miciano nga mangin safe ang duha ka mga priso nga nagpalagyo sang Lunes sang kaagahon pananglitan nga magsungka ang mga ini.
Sa interview sang Bombo Radyo Bacolod kay Miciano, ginpahayag sini nga padayun karon ang manhunt operation sa duha ka mga detainee nga ginkilala kanday Jimmy Sablon, residente sang Barangay Robles, La Castellana, Negros Occidental nga may kaso nga frustrated murder kag si Ramonito Ventura, residente sa Barangay Buenavista, Murcia, Negros Occidental nga may kaso nga robbery.
Nagpalagyo sa likod nga bahin sang prisuhan ang mga priso pinaagi sa pagsaka sa pader, pag-utod sa grills kag paggamit sang malong agud nga makagwa.
Ang duha ang nakahunong sa magkatupad nga dormitoryo sa room 22 kag 23.
Nahibaluan nga bangod yara sa modified lockdown ang district Jail, 15 lamang ka mga personnel ang naga-operate sa kabug-usan, apang lima lamang ang nakaduty sa amo nga tinion.
Suno kay Miciano, may yara gid sila sang liability kun mapamatud-an nga may lapses sila sa ila nga function sa pag-safekeep sa mga priso.
Nahibaluan nga wala naman makuhaan sang CCTV footage ang pagpalagyo kag padayun pa nga ginahibalo kun ngaa wala natalupangdan sang mga nakaduty nga BJMP personnel.
May mga lead naman nga ginasundan ang mga otoridad kag igatsekyar kun yara sa lugar ang mga nakapalagyo nga priso.
P10,000 naman ang gintalana nga reward sa mga makatudlo sa kada isa sa mga suspetsado.
