Ginpostpone ni Bacolod City Mayor Evelio “Bing” Leonardia ang implementasyon sang Home Quarantine Pass (HQP) System kag Check-Up Points sa Bacolod City nga natalana kuntani nga magsugod subong nga adlaw, Setyembre 3, sa Setyembre 6 tubtob Setyembre 19, 2020.
Sa exclusive interview sang Bombo Radyo kay Leonardia, ginpahayag sini nga nagtawag sa iya kahapon si Association of Barangay Captains president Lady Gles Gonzales-Pallen kag nag-ayo nga i-extend ang implementasyon sang HQP sa Setyembre 6 bangud wala pa nakatapos sa pagpanagtag ang mga dalagko nga barangay kag ginakulang pa ang ila nga HQP.
Matapos mag-istorya kay Vice Mayor El Cid Familiaran nga pinuno man sang interagency task force against COVID-19 sa Bacolod, nagpagwa ini sang Executive Order No. 58-A nga nagamando sa pagpostpone sang nasambit nga pagpatuman subong man ang border control sa Dominggo, Agosto 6, kun sa diin magapatigayon man sang Sunday lockdown.
Suno sa iya, ang nasambit nga tikang ang para man sa kaayuhan sang tanan kag agud masiguro nga may yara sang HQP ang tanan nga pumuluyo antes ini ipatuman.
Samtang, gin-anunsyar ni Bishop Patricio Buzon nga suspendido ang selebrasyon sang misa sa mga kasimbahanan sa ciudad sang Bacolod sumugod subong nga adlaw, Setyembre 3 tubtob Setyembre 15.
Magapadayon naman ang funeral masses kag iban nga mga celebration of the sacraments apang napulo ka mga persona lang ang sarang nga makatambong kag hugot nga ipatuman ang mga health protocols.
