Pilason ang subject sang drug buybust operation sang Regional Drug Enforcement Unit 6 sa Blk. 15, Lot 51, Camella Subdivision, Brgy. Bata, Bacolod City kahapon sang hapon matapos matiruhan sang pulis sang nagtuyo ini nga magpalagyo.
P272,000 nga balor sang illegal nga druga ang nakumpiskar sa buybust operation batok kay Erwin Agsam, legal ang edad, temporaryo nga nagapuyo sa nasambit nga lugar kag may warrant of arrest sa kaso nga murder.
Nakuha sa iya paghinakop ang 22 ka plastic sachet sang suspect shabu lakip na ang buybust item; P1,000 nga buybust money; isa ka itom nga belt bag; isa ka itom nga coin purse; P1,200 cash; isa ka unit sang calibre 38 nga wala sang serial number kag may unod nga lima ka mga live ammunition; isa ka itom nga leather inside holster kag isa ka nissan van.
Ang nakumpiskar nga illegal nga druga ang ginbanta nagabug-at sang 40 gramos.
Sang ginpatigayon ang buybust operations, nagtuyo pa kuntani nga magpalagyo si Agsam gani may nagluntad nga linukpanay kun sa diin nakaagom ini sang igo sa iya nawala nga tiil.
Gilayon naman nga gindala sa ospital ang suspetsado para sa nagakaigo nga pagbulong kag magapangatubang sang dugang nga kaso sa paglapas sa R.A. 9165 ukon Comprehensive Dangerous Drugs Act of 2002.
