Nakahanda ang Philippine Drug Enforcement Agency nga magpangayo sang pasaylo sa pamilya sang 14-anyos nga bata nga lalaki matapos masal-an nga subject person sa buybust operation nga ginpatigayon sang PDEA Region 6 Special Enforcement Team sa Purok 8, Barangay Mandalagan ciudad sang Bacolod nagligad nga Miyerkules.
Sa exclusive interview sang Bombo Radyo Bacolod sa menor de edad, ginpahayag sini nga madul-ong siya kuntani sang kwarta sa iya amay nga isa ka construction worker agud ibakal sang sud-an.
Samtang gahulat sa iya nga tatay, nagpungko ini sa tricycle sa sagwa sang ginakay-o nga balay sang hinali lang nga may nag-agbay sa iya nga isa ka lalaki kag ginpamangkot siya kun sa diin ini makadto.
Pagkadugay-dugay suno sa menor-de-edad, may nagpalapit nga van kag gintayaan ini sang pusil sang mga agent samtang ginapasulod sa van.
Ginpangitaan ini sang items apang wala sang may nakuha sa bata.
Suno sa iya, matapos marikisa, naghambal lang ang mga agent nga “negative ni” kag gilayon siya nga ginpagwa sa van kag ginhambalan nga maghipos lang.
Samtang, suno naman sa amay sang menor-de-edad nga si Edgardo Escalona, kuntani sa sunod siguraduhon anay sang mga agent ukon asset kun sin-o gid man ang subject person sa buybust operation agud malikawan ang kaangay nga insidente.
Suno diri, maayo lang wala hinadlukan kag nagdalagan ang iya bata bangud posible nga natiruhan pa ini.
Samtang, nagpasalig naman ang pinuno sang PDEA-6 Special Enforcement Team nga si Agent Bamboo nga iverify niya ang amo nga impormasyon kag handa ini nga magpangayo sang pasaylo sa menor-de-edad kag sa pamilya sini.
Suno diri, wala siya sang ideya angot sa amo nga insidente apang iya ginkumpirmar nga may yara sila sang ginpapondo nga pila ka mga tawo matapos nga nagdinalagan ang mga ini.
