Gilayon nga nagpasugot si Negros Occidental Governor Eugenio Jose Lacson sa hingyo sang pila ka returning overseas Filipinos paagi sa Bombo Radyo Bacolod nga mapaidalom sila sa swab test antes magpauli sa ila balay bisan ginapahanugutan na sang inter-agency task force nga indi na magreswab.
Sa interview sang Bombo Radyo Bacolod kay Alyas Nonoy, sang Agosto 22 sila nag-abot sa syudad sang Bacolod kag ginpaidalom sila sa swab test sang Agosto 23.
Nag-abot ang resulta sang Agosto 25 nga nagpositibo sila sa coronavirus gani ginsaylo sila sa isolation facility sang Agosto 29.
Suno kay Alyas Nonoy, natalana nga irelease sila sa isolation facility sa Setyembre 7.
Nagakahangawa ini bangud lunsay na nga mga senior citizen ang iya ginikanan gani luyag sini nga magpareswab kag kun matigayon, willing man siya nga magbayad.
Samtang, sa pagpakig-angot sang Bombo Radyo, ginkalipay ni Governor Eugenio Jose Lacson nga luyag sang ROF nga magpareswab.
Suno kay Lacson, siya kaupod ang mga alkalde sang probinsya ang nag-isa agud pamatukan ang luyag sang National Task Force.
Nagpanindugan man ini nga ipadayon ang reswabbing sa mga OFW kag nagapati ini nga wala sang kaso kun padayunon sini ang pagpatuman sang local health protocols.
Nagalaom man ini nga magpagwa sang statement ang mga ROF sang probinsya nga nagapamatok sa indi pag-iswab sa mga OFW nga nagapauli sa probinsya.
Ginpahayag man sini nga mahatag na siya sang instruction agud nga mareswab ang mga OFW.
Tuman naman ang pasalamat ni Alyas Nonoy sa Bombo Radyo nga nagpasugot ang gobernador.
