Ginalauman sang pinuno sang Department of Social Services and Development sang Bacolod nga matapos na bwas ang pagpanagtag sang social amelioration cash grant para sa mga residente nga nag-apply paagi sa relief agad app.
Sa interview sang Bombo Radyo Bacolod kay Pacita Tero, nag-umpisa ang pay-out sang Miyerkules paagi sa payment center.
Aminado si Tero nga nagdoble ang ubra nila sa validation sang mga beneficiaries bangud may yara sang mga codes nga magkapareho gani ginaluad sang system gani kinahanglan nga ila pangitaon sang mga ini kun sa diin nagkapareho agud maupload naman nila.
Ginpahayag man ni Tero nga gamay nalang ang casualty sa name correction sa mga beneficiaries bangud mismo ang mga ini ang nag-encode sang ila mga pangalan.
Apang indi man malikawan nga may masala gani ginapanugyanan ini nga magpadulong sa tagsa nila ka barangay agud mahimuan sang Certificate of The Same person bilang pamatuod nga ang nakasulat nga pangalan kag ang ginpresent nga ID sang beneficiaries ang isa lang ka tawo.
Suno kay Tero, masobra 11 mil ang beneficiaries nga nag-apply sa relief agad kag ginabanta tres mil ka mga beneficiaries ang nahatagan kada adlaw.
Suno diri, mahimo nga magfill-up sang form ang mga beneficiaries antes magkuha sang cash grant sa Mlhuillier.
Ginapadal-an sang message ang mga beneficiaries agud mahibaluan ang schedule sa pagkuha kalakip ang code apang nagaginutok sa gihapon bangud madamo sa ila ang indi kahulat sang schedule nga nagpangita nalang sang matawhay nga branch sang nasambit nga remittance center kag nagkuha na nga daan.
Aminado man si Tero nga indi na maobserbar ang social distancing ukon ang mga health protocols.
