Temporaryo nga nagapuyo sa gym sang Barangay Taculing ang mga pamilya nga biktima sang sunog nga nagluntad sa Purok Sunrise, Barangay Taculing, Bacolod City kahapon sang hapon.
Suno kay Punong Barangay Lady Gles Gonzales-Pallen sang Barangay Taculing, may estimated nga 31 ka mga pamilya ang yara sa gym.
Indi naman sini masiguro ang kabug-usan nga numero sang pamilya bangod pila sa mga ini ang naga-istar sa isa ka panimalay apang lain-lain nga pamilya.
Ginaatindir naman ang mga ini sang barangay pinaagi sa paghatag sang foodpacks.
Ginatan-aw nga magahatag man sang calamity assistance sa mga apektado ang ciudad sang Bacolod.
Ginalantaw man sini kun may mga nasamaran sa insidente.
Indi naman tanan nga naapektuhan ang nagtinir sa gym sang barangay bangod iban sa mga ini ang nagsaylo sa mga katupad balay ukon sa iban nga mga himata.
Nangin bayanihan naman ang natabo sa nagluntad sunog bangod sa pagbuligay sang mga pumuluyo agud nga mapalong ang kalayo.
Ginkumpirmar naman ni Bacolod City Fire Marshal Fire Chief Inspector Publio “Buboy” Ploteña nga 23 tanan ka mga balay ang nasunog sa Purok Sunrise, Barangay Taculing ciudad sang Bacolod kahapon kun sa diin 19 ang totally damaged samtang apat naman ang partially damaged.
Sa interview sang Bombo Radyo Bacolod kay Ploteña, padayon pa ang ila nga imbestigasyon angot sa gintunaan sang kalayo.
Suno sa iya, ginaverify pa nila ang impormasyon nga kandila ang ginhalinan sang sunog.
Nagsugod sa puluy-an ni Roel Tordillas ang sunog nga naka-angkon sang menor nga kapilasan.
Suno kay Ploteña, ginabanta nga nagadangat sa kapin P300,000 ang halit nga gintuga sang sunog.
Takna alas-2:17 kahapon sang hapon sang natigayon nga mapalong ang kalayo kun sa diin nakabaton ang Bureau of Fire Protection-Bacolod sang tawag takna ala-1:32 sang hapon.
