Nabaton na sang probinsya ang report sang Department of Health (DOH) tuhoy sa mass testing nga ginpatigayon sang Agosto 27 tubtob 30 samtang indi pa kumpleto ang nag-abot gikan sa mass testing sang Agosto 31.
Suno kay Provincial Administrator Atty. Rayfrando Diaz, nagikan ang mga resulta sa Teresita Jalandoni Provincial Hospital, Red Cross kag ang iban ang nagikan sa Cebu.
Luyag sang probinsya nga matipon ang tanan nga nangin resulta sang mass testing agud nga mahatag sa mga pumuluyo ang accurate nga impormasyon.
Suno sa Provincial Health Office (PHO), padayon pa nga gina-update ang mga records.
Target naman kuntani nga kahapon mapagwa ang resulta nagikan sa masobra 6,300 nga gintest agud mahibaluan kun pila gid ang nagpositibo gikan sa probinsya kag kun pila ang sa Bacolod City.
Sa karun, malapit nalang nga makumpleto ang resulta sa Red Cross samtang may yara pa sang ginahulat gikan sa Cebu.
Ginatinguhaan naman nga mapadasig ang paggwa sang resulta agud nga mahibaluan kun sin-o kag kun diin ang madamo positibo kag makahimu sang tikang.
Nakapatigayon naman ang probinsya sang 2nd kag 3rd line sang contact tracing kalakip ang mga asymptomatic.
