Nagbalik subong nga adlaw sa full alert status ang mga kapulisan sa syudad sang Bacolod may kaangtanan sa pagsugod sang pagpatuman sang Home Quarantine Pass buas Setyembre 6.
Madumduman nga sang Setyembre 3 pa kuntani maumpisa ang implementasyon sang HQP apang gin-hold ini bangud sa hingyo sang mga punong barangay matapos ginkulabos sila sang panahon sa pagpanagtag sang mga HQPs sa mga pumuluyo.
Sa interview sang Bombo Radyo Bacolod kay Bacolod City Police Office Police Lt. Col. Ariel Pico, ang mga lugar nga pagabutangan sang inner control point ang sarang nga mabaylo pa depende sa mando sang city director.
Suno kay Pico, subong nga adlaw sila masugod sa pagbutang sang mga outer kag inner borders sang syudad.
Nahibaluan nga may yara sang igabutang nga walo ka mga outer border points samtang 27 naman ang mga inner borders.
Suno kay Pico, istriktuhon man nila ang pagpatuman sang odd kag even scheme sa mga HQP.
Ang HQP number nga nagatapos sa 1; 3; 5 kag 9 ukon odd numbers ang mahimo makagwa sa adlaw sang Lunes, Miyerkules kag Biyernes samtang ang mga nagatapos naman sa even numbers ukon 0; 2; 4; 6; kag 8 ang sarang makagwa sa adlaw sang Martes, Huwebes kag Sabado.
Magapatuman naman sang lockdown sa adlaw sang Domingo gani wala na sang makagwa.
Nagalaom man si Pico nga sundon sang mga pumuluyo ang mando sa paggamit sang HQP agud malimitahan ang paggwa sang mga tawo kag wala sang madakpan nga mga violators.
