Ginpasalig sang Overseas Workers Welfare Administration (OWWA) Region 6 nga may programa ang ahensya agud nga mabuligan ang mga overseas Filipino workers (OFWs) nga nadulaan sang trabaho bangud sa pandemic.
Suno kay OWWA Region 6 officer-in-charge Rizza Joy Moldes, padayun ang paghatag sang ahensya sang serbisyo nga sarang mabatun sang mga nagapauli nga mga OFW.
Sa karun, ginadihon naman sang OWWA ang programa nga Educational Assistance through Scholarship in Emergencies (EASE) para sa mga kabataan kag kolehiyo sang mga naapektuhan nga OFW.
Santo sa ulihi nga data sang Setyembre 2, may yara na sang masobra 21,000 ang nakapauli nga mga OFW sa Western Visayas.
Samtang sa record naman nga nabatun tatlo na ka adlaw ang nakaligad, may-yara pa sang nabilin nga lima ka libo nga mga OFW ang yara sa nagkalain-lain nga quarantine facility sa Manila nga nagikan naman sa nagkalain-lain nga rehiyon sa pungsod.
Sa pinakaulihi nga statistics report sang OWWA, ang mga OFW nga nagikan sa Western Visayas sang Disyembre 2019 ang nagdangat na sa tunga sa milyon.
Samtang sa subong nga tinion, madamo naman sa mga seafarers, gikan sa Tourism Industries kag mga cruise ship ang nadulaan sang trabaho tuga sang pandemic.
Ginpasalig naman sini nga may nagkalain-lain nga programa ang OWWA para sa mga OFW kaangay sang scholarship, assistance para sa mga may balatian, livelihood program kag skills upgrading program samtang yara ang mga ini sa pungsod.
Nagahingyo man ini sang dugang nga paghangop gikan sa mga seafarer, OFW kag mga himata sang mga ini bangod sa masami nga nagabaylo-baylo nga polisa nga gina-implementar sang gobyerno.
Pagatinguhaan naman sang ahensya nga ma-atinderan ang tanan nga isyu kag ginapasalig ang padayun nga pagbulig agud nga makapauli kag makaupod na sang mga OFW ang tagsa ka pamilya.
