Ginakahangaw-an nga maatrasar ang search and rescue operations para sa mga Pinoy nga crew sang barko nga naglugdang sa baybayon sang Japan sang Miyerkules sang kaagahon bangud sa nagahilapit nga pagsulod sang Bagyo Haishen.
Sa interview sang Bombo Radyo Bacolod kay Bombo Correspondent Josel Palma, ginalauman nga magasulod sa Domingo tubtob Lunes ang panibag-o nga bagyo santo sa abiso sang Japan meteorological agency kag ini man ang ikatatlo nga mabaskog nga bagyo nga magasulod sa pungsod umpisa sang nakarecord ang Japan sang mabaskog nga bagyo, 70 na ka tuig ang nakaligad.
Suno kay Palma, ginalauman nga mangin sablag sa nagapadayon nga search and rescue operations sang Japan Coast Guard sa mga crew sang Gulf Livestock 1 sa East China Sea bangud ang bagyo ang magaigo sa malapad nga lugar nga nasakpan sang Amami Oshima kag Kyushu nga napalibutan sang siyam ka mga probinsya kag makita man diri ang Fukuoka.
Madumduman nga ang barko nga may sakay nga kapin 6 mil ka mga cattle ukon baka ang nagpadala sang distress call nagikan sa nakatungdan nga bahin sang Amami Oshima Island sa southwestern Japan sang Miyerkules bangud sa Typhoon Maysak.
Nakasalbar ang Pinoy nga chief officer nga ginkilala kay Eduardo Sareno, 45-anyos sang Miyerkules sang gab-i.
Ang ikaduha nga crewman ang nakit-an kahapon apang napatay bangud unconscious na ini sang nasapwan.
Sa karon, wala pa natumod ang identity sang ikaduha nga crew.
Kahapon, nasalbar naman si Jay-nel Rosales sang Cebu kag nagapaayo na ini sa karon sa ospital.
Nahibaluan nga 39 sa 43 crew members ang lunsay mga Pilipino kalakip na si Andren Diamantin Payas sang Barangay Bata, Bacolod City kag pila ka mga taga-Iloilo.
Ang nagapangita sa missing nga mga crew ang ginalakipan sang tatlo ka barko, apat ka aircraft kag duha ka mga divers.
Kampante naman si Palma nga indi mag-untat ang Japanese authorities sa pagpangita samtang may paglaom nga buhi ang mga crew.
