Nagapabilin ang request sang ciudad sang Bacolod nga temporaryo nga ipa-iway ang pagpapauli sang mga locally stranded individual (LSI) kag mga overseas Filipino workers (OFWs).
Suno kay Bacolod City Mayor Evelio “Bing” Leonardia, ginakahangaw-an sini nga indi masarangan sang ciudad ang pag-assist sa mga maga-abot nga pumuluyo.
Gindugang pa sini ang naga-conflict nga mga derektiba gikan sa mga national bodies.
Madumduman nga nagpagwa sang mando ang National Task Force (NTF) nga indi na kinahanglan nga magpaidalum sa 14 days quarantine kag swab test ang mga LSI kag OFW bangod nahemu na ini sa Metro Manila.
Apang nagapanindugan ang alkalde nga makapila na ka beses nga natabo nga may mga nagnegatibo ang RT-PCR test sa Manila apang nagapositibo sang gin-test sa ciudad.
Ginatan-aw nga posibilidad sang transmission amo ang byahe kun sa diin may posibilidad nga may makaupod nga positibo.
Ang request ang gindihon kasunod sang mga nangin problema sa mga ospital sa ciudad.
Nahibaluan nga madasig nga nagadamo ang cases sang COVID-19 sa Bacolod apang naga-iban naman ang mga health workers bangod pila sa mga ini ang nalatnan man sang balatian, may mga nakaquarantine kag mag pila ang nag resign kag nag untat na sa pag-obra.
Ini ang mga luyag naman kuntani nga matinguhaan nga masulbar sang ciudad.
Kagab-i, nagpagwa ini sang pahayag nga nagaapelar sa NIATF kag NTF nga respetuhon ang kaugalingon nga health protocols sang ciudad.
Ginpadangat sini ang panindugan sang Bacolod nga kinahanglan nga magpaidalum sa swab test kag facility quarantine ang mga nagpauli nga ROFs kag LSI antes ang mga ini papulion sa ila mga puluy-an.
