Pilason ang isa ka 38 anyos nga lalaki matapos ginlabo sang iya kaugalingon nga amay sa ciudad sang Kabankalan kahapon sang aga.
Sa interview sang Bombo Radyo kay Police Lt. John Paul Tabujara, hepe sang Kabankalan City Police Station, nagapamahaw ang biktima nga si Albert Apatan, 38 anyos, single kag suspetsado nga si Jomarie Apatan, 60 anyos, lunsay mga residente sang nasambit nga lugar, sang may nagluntad nga paglalisay kag indi pag-ichindihanay sa tunga sang mag-amay.
Suno kay Tabujara, nagkuha sang talibong ang amay kag hinali lang nga ginbuno ang biktima.
Nakaangkon ini sang igo sa likod sang ulo, kamot kag abaga.
Ginhingagaw ini dala sa balaybululngan kag yara na sa karun sa estable nga kondisyon.
Boluntaryo naman nga nagsungka sa police station ang amay.
Suno sa hepe, may yara sang rekord nga carnapping ang biktima kag ila pa gina-imbestigahan ang background sini.
Gindugang man ni Tabujara nga may yara sang daan nga hiligut-anon sa tunga sang mag-amay kag kun wala ini maunahan sang Jomarie, possible nga ini ang nangin biktima.
Sa karun, ginahulat pa nila nga makabugtaw si Albert agud madesisyunan kun pasakaan sini sang kaso ang amay.
