Istrikto sa pagpanagtag sang Home Quarantine Pass (HQP) ang Punong Barangay sang Barangay Tangub ciudad sang Bacolod.
Sa interview sang Bombo Radyo Bacolod kay Punong Barangay Noli Villarosa, ginpahayag sini nga maid-id siya ka tama sa pagpanghatag sang mga HQP agud nga malimitahan ang paggwa sang iya mga pumuluyo.
Suno kay Villarosa, kun may yara sang senior citizen nga makuha sang HQP, iya gid ginapamangkot kun may yara ini sang hinablos ukon apo nga pwede masugod.
Ini agud malikawan nga maggwa pa sa tagsa ka mga panimalay ang mga senior citizen bilang ginakabig bila isa sa most vulnerable sector sa balatian.
Gin-athag man sang punong barangay indi pwede ang pagtudluanay kun sa diin makuha sang HQP.
Suno sa iya, ang kada purok president ang natalana nga magpanghatag sini sa ila nasakupan.
Dugang pa ni Villarosa nga iya akigan ang purok president nga wala nagahatag sang HQP kag nagatudluanay pa kun sa diin makuha.
Ini ang kasunod sa reklamo nga ginpadangat sa Bombo Radyo Bacolod nga wala pa sang HQP ang pila ka mga residente sang Purok Ramelo.
Suno sa punong barangay, posible wala lang naka-arapal sa pagpanagtag ang purok president.
Dugang pa sini nga pwede gid magdiretso sa barangay hall agud magkuha sang HQP bangud iya lang tawgan ang punong barangay kun nahatagan na ini ukon wala.
