Ginkompirmar ni Bacolod City Vice Mayor El Cid Familiaran nga magapaidalom pa ini sa re-swab test matapos nga nagpositibo ang isa ka babayi sini nga apo matapos nga magpaidalom sila sa mass testing.
Sa interview sang Bombo Radyo Bacolod kay Vice Mayor El Cid Familiaran nga amo man ang pinuno sang Inter-Agency Task Force Against Covid-19 sang Bacolod, ginpahayag sini nga wala man ini nakahibalo kun sa diin natapikan sang coronavirus ang iya apo.
Ginalantaw sini nga sarang nga nalatnan ang apo sini sang iya staff nga nagpositibo man sa balatian nga nagakadto sa ila balay apang asymptomatic.
Suno kay Familiaran, apat sa mga staff sini nga nagabulig sa iya facilitate nga magdul-ong sang relief goods sa mga lugar nga apektado sang paglockdown bangod sa mga nagpositibo sa COVID 19.
Tanan sa mga ini ang asymptomatic.
Nagpanugyan man ini sa mga pumuluyo nga maghalong kag magsunod sa mga health protocols.
Samtang, ginpahayag man ni Familiaran nga 4, 300 ang nagpaidalom sa mass testing kag nakagwa na ang resulta kun sa diin 531 ang nagpositibo.
Aminado man ini nga magataas ang kaso bangud sa mass testing.
