Ginarespeto sang mga opisyales sang syudad sang Bacolod ang desisyon sang national inter-agency task force nga pagpaidalom sang syudad sa Modified Enhanced Community Quarantine (MECQ) halin subong nga Setyembre 8 tubtub 30.
Sa interview sang Bombo Radyo Bacolod kay Bacolod City Administrator Em Ang, ginpahayag sini nga dapat sundon sang Local Government Unit sang Bacolod City ang mando sang National Inter-Agency Task Force.
Nagapati man ini nga may yara sang basehan ang national IATF sa pagpaidalom sang syudad sa MECQ.
Suno kay Ang, nagalantaw man ang mga ini sang status sang syudad sa mga data nga available sa Department of Health kag nakita nila nga may yara sang nesesidad ang pag-escalate sang quarantine status sang syudad.
Ginpahayag man ni Ang nga gin-ubra man sang syudad ang masarangan sini agud nga indi maglala ang kaso sang COVID-19 apang madamo ang nagpasaway gani naglab-ot sa punto nga nagpangayo na sang bulig ang syudad sa national government agud mabuligan nga mapanubo ang kaso sang balatian sa syudad.
Suno pa diri, nakita man sang team ni Environment Secretary Roy Cimatu nga manubo ang compliance sang mga residente sa pagtuman sa mga health protocols gani nagasaka ang kaso sang paglatnanay sa sang balatian sa syudad.
Nahibaluan man nga magabisita sa syudad bwas nga adlaw ang pinuno sang National Inter-Agency Task Force Carlito Galvez kag National Defense Secretary Delfin Lorenzana.
