Madamo pa nga mga driver sang pampubliko nga jeep ang naghingagaw sa pagbyahe halin kaina sang aga bisan ginpaidalom na sa modified enhanced community quarantine ang ciudad sang Bacolod.
Nahibaluan nga santo sa guidelines sang inter-agency task force, ginadumilian ang pagbyahe sang public transport kaangay sang jeep kag taxi sa idalom sang MECQ.
Apang bangud wala pa sang executive order nga ginpapanaog si Mayor Evelio Leonardia, madamo pa ang nagbyahe nga mga PUJ halin kaina sang aga.
Samtang, gin-athag naman sang Media Relations Officer sang Vallacar Transit Incorporated nga wala nag-untat ang biyahe ang Ceres bus subong nga adlaw apisar nga ginpaidalom na sa Modified Enhanced Community Quarantine (MECQ) ang syudad sang Bacolod.
Sa interview sang Bombo Radyo Bacolod kay Jade Seballos, ginpahayag sini nga magapadayon sa pagbiyahe ang Ceres bus subong nga adlaw samtang nga wala pa sila sang nabaton nga order nagikan sa Local Government Unit (LGU) ukon sa Land Transportation and Franchising Regulatory Board (LTFRB) nga indi sila magbiyahe.
Suno kay Seballos, indi nila sarang nga pangunahan ang mando sang ahensya kag LGU bangud sarang nga macancel ang prangkisa sang Vallacar Transit kun indi sila magbiyahe nga wala sang ginpagwa nga mando.
Ginpahayag man sini nga ang mga bus ang indi na makasulod sa Barangay Ma-ao, Bago City kasunod sang ginpagwa ni Bago City Mayor Nicholas Yulo nga executive order nga nagpaidalom sa bilog nga barangay sa lockdown sa sulod sang 14 ka adlaw.
Wala man sang kahangaw-an ang riding public suno kay Seballos bangud wala pa sang mando nagikan sa LGU sang Bacolod apang kun may ara na, sundon ini sang Vallacar Transit.
