Padayon pa ang imbestigasyon sang Bacolod City Police Station 1 agud matumod ang identity sang bangkay nga nasulod sa sako nga nasapwan sa bakante nga lote sa Purok Malipayon, Brgy. 35, Bacolod City kaina sang aga.
Gindumdom sang isa ka bata nga scrap ang sulod sang sako gani nagpanugid ini sa iya amay.
Sa interview sang Bombo Radyo sa amay sang walo katuig nga bata nga si Alfredo, ginpahayag sini nga nagapangscrap sila sang nakita sang anak sini ang sako kag ginpahibalo ini sang iya anak sang iya nakit-an nga indi scrap ang sulod sang sako.
Gintawag sini ang iya nga abyan kag sang ila ginlili ang sako, diri nahibaluan nga bangkay sang lalaki ang unod apang wala man nila ini ginhikap.
Suno kay Alfredo, nakadelargo kag nakaluab ang lalaki.
Wala man sila sang impormasyon nga may nadula nga residente sa ila lugar.
Samtang, ginpahayag man ni Barangay Kagawad Roberto Dela Peña sang Barangay 35 nga may yara sang nagajogging kag nakita sini ang bata nga nagahibi samtang nagpalapit sa iya sa manokan sini kag nagpahibalo nga may nasapwan nga bangkay.
Ginkompirmar man sini ang impormasyon antes magpahibalo sa barangay kag ginpahibalo man sang barangay ang Bacolod City Police Station 1.
Wala man ini nakahibalo kun sa diin ang igo sang biktima nga gintunaan sang iya kamatayon bangud nagahapa ini kag nakabaklid ang kamot.
Suno kay Dela Peña, may yara sang nakakita nga nagpanginhas nga may nagpark nga salakyan nga duag pula antes pa man makita ang sako.
Sa pihak sini, indi pa matumod kun ang bangkay ang ginbilin sang mga tawo nga sakay sa pula nga salakyan.
