Aminado ang inter-agency task force deputy chief implementer for the Visayas nga ang padayon nga pagsaka sang numero sang kaso sang coronavirus kada adlaw sa Bacolod ang rason kun ngaa ginrekomendar nga ipaidalum sa modified enhanced community quarantine (MECQ) ang Bacolod City.
Sa exclusive interview sang Bombo Radyo kay Retired General Melquiades Feliciano, ginpahayag sini ang tuman ka taas nga numero sang daily cases sang COVID-19 sa Bacolod kun sa diin nagadangat sa masobra 100 ka mga kaso kada adlaw subong man ang kapasidad sang mga ospital nga maka-akomodar sang mga pasyente ang nangin basehan sang ila rekomendasyon sa national-IATF nga ipaidalum sa MECQ ang ciudad.
Suno kay Feliciano, yara na sa kritikal nga level ang capacity utilization rate sang mga ospital sa Bacolod samtang nagapadayon man ang pagdamo sang mga COVID-19 patients nga kinahanglan i-admit.
Suno sa iya, kun magpadayon ang ini nga sitwasyon, madugangan ang mortality sa ciudad kag ini ang ila ginalikawan nga matabo.
Gindugang man sini nga may mga pasyente sa karon nga ginapadala na lang sa mga ospital sa sagwa sang ciudad bangud indi na makaamodar ang mga balaybululngan sa Bacolod.
Ginpahayag man ni Feliciano nga apisar sang nagadamo nga kaso kada adlaw, mas maayo na lang nga nahibaluan ini kag iya ginakabig nga healthy sign bangud nagakadeterminar ang mga positibo.
Suno sa iya, indi kaangay sa Metro Manila, nagasugod pa lang ang pagsaka sang curve sa Bacolod kag mas manami kun gilayon ini nga matapos kag macontain.
Suno diri, ila tinutuyo ang makit-an kun diin ang virus gani gintukod ang Emergency Operation Task Force nga sa karun, on the process kag nagapatigayon pa sang training agud makasugod sa masunod nga duha ka semana.
Nagpahanumdum man ini nga ang pagpakigbato sa COVID-19 ang indi lang iya sang mga opisyal kundi subong man sang mga pumuluyo gani nagahingyo ini nga magsunod kag mag-obserbar gid sa minimum health protocols.
