Ginadangop na lang sang iloy ni Joel Aviles Jr. sa Ginoo ang hustisya sa gindangatan sang iya bata nga nasapwan nga nasulod sa sako sa bakante nga lote sa Purok Malipayon, Brgy. 35, Bacolod City, Setyembre 8 sang aga.
Sa exclusive interview sang Bombo Radyo kay Lilibeth Romeo, 47 anyos kag residente sang Purok 3, Lampirong, Magsungay, Brgy. Singcang Airport, nagatrabaho bilang isa ka massage therapist sa isa ka spa sa New Government Center si Joel kag sa Abada Iskay, Brgy. Vista Alegre ini nagapauli bangud lapit lang sa iya nga ginaubrahan.
Suno kay Romeo, ginsugat ini ni Joel sa prisuhan sang Lunes matapos siya ang mapriso bangud sa kaangtanan sa illegal nga druga kag wala ini nag-abi-abi nga amu naman to ang ila ulihi nga pag-updanay.
Suno sa iya, naglisensya ini sa iya nga mainom anay apang wala na ini nakapauli pagkasunod nga adlaw.
Sang Martes, alas 12:00 sang kaagahon, nanawag ang isa ka bata sini nga si Jennifer nga nasapwan si Joel sa Brgy. 35, Bacolod City.
Indi pa kuntani magpati ang iloy kag wala kag wala man ini nagtulok sa itsura sang bangkay bangud indi sini masarangan nga makit-an ang inagyan nga kabudlayan sang iya nga bata.
Suno diri, wala gid sang bisyo ang iya nga bata magluwas lang sa pag-inom kag wala man ini sang kontra, karelasyon ukon naintrahan nga grupo.
Apang, kun mahubog ini, suno sa iya, yawan sila kun kaisa pangita diri kag nagatulog ini sa iban nga balay
Indi sini mapunggan ang pagtulo sang iya nga luha samtang ginapanumdum ang gin-agyan ni Joel sa mga suspetsado kag ginapangayo sa Ginoo nga madakpan ang mga suspetsado agud mahatagan sang hustisya ang natabo sa iya nga bata.
