Ginsapol sang chief implementer sang National Policy Against COVID-19 nga si Secretary Carlito Galvez ang mga opisyales sang ciudad sang Bacolod kagab-i kasunod sang pagpaidalom sang Bacolod sa modified enhanced community quarantine sugod Setyembre 8.
Kaupod ni Galvez ang iban nga mga opisyales sang National Inter-Agency Task Force for the Management of Emerging Infectious Diseases agud diskusyunan ang mga tikang agud macontain kag malikawan ang paglapta sang COVID 19.
Una na nga ginpahayag ni Bacolod City Mayor Evelio Leonardia nga ginpahibalo siya ni Executive Secretary Salvador Medialdea nga maabot sa ciudad ang pila ka opisyales sang NIATF.
Upod ni Galvez ang tatlo nagikan sa apat ka anti-COVID czars nga gindesignate ni Presidente Rodrigo Duterte nga amo sanday Chief Testing Czar Secretary Vivencio “Vince” Dizon; Chief Tracing Czar Baguio City Mayor Benjamin “Benjie” Magalong; kag Chief Treatment Czar Health Undersecretary Leopoldo “Bong” Vega.
May natalana kuntani nga press conference kasunod sang pagsinapol apang ini ang ginkanselar.
Apang ginalauman nga ginpresentar sang NIATF ang national action plan kalakip na ang operations protocol kag strategy.
Ginalauman man nga ila igapresentar ang mga good practices nga ginhimo sa Cebu kag Navotas City kun sa diin nagnubo na ang kaso sang COVID 19.
Ang pagsinapol ang ginpatigayon sa Negros Residences kag nag-upod man diri ang pila ka mga opisyales sang Negros Occidental, business leaders sa ciudad sang Bacolod kag sa probinsya.
